Loihkyep mare kaw lamu ga kashun hkat ai manghkang hte seng nna, kadai mung n galaw lu na matu asuya ni dawdan ya

Mungmyit Sinli Ga (Kachin Sub-state), Mung Mau Ginwang, Mungwi Buga Loihkyep mare hpung masha ni hte Balawng (Ta-ang) ni lamu ga gashun ai manghkang hpe Myen Asuya, Namhkam Uphkang Tara Rung kaw nna, kadai mung n galaw lu na hku dawdan ya ai lam buga masha ni shana wa ai kaw na chye lu ai.

“Ndai manghkang hte seng nna April shata praw 2 ya shani Loihkyep buga hpung masha ni Namhkam tara rung de lahkawng lang ngu na laika mara da ai hpang April shata praw 10 ya shani hta tara rung kawn lahkawng maga na lit nga ai salang ni hpe shaga la nhtawm, woi bawngban jahkrup jahkrum ya ai raitim pri nem ai hku nlu dawdan ya ai.

Dai majaw tara rung ni kawn, nanhte mare masha ni hte atsawm sha wa bawngban nna lahkawng maga na ni laika bai mara mu, nhtoi 10 ya aten jaw na, nanhte mara dat ai laika hpe hkap yu nna, ndai kaw lu dawdan jang dawdan na, nlu dawdan jang ntsa tsang de shalai dat na, nanhte mung ndai de nsa ra sai lam tara rung kaw tsun dat ai” nga nna Loihkyep mare na Hpt. Dingsi Tu Awng (Hpung Ningbaw) wa tsun ai.

Kadai nlu galaw na hku dawdan ya ai raitim anhte gaw myit pyaw sai hku re. Gawkngu sha nshadun jang gaw anhte tang madun ai mung ndai gawkngu nshadun na matu sha tang madun ninghkap ai re, nga nna Hpt. Wa matut tsun ai.

Ndai lamu ga manghkang hte seng nna, Namhkam uphkang tara rung kaw sha, April shata 21 ya shani lahkawng maga pri nyem ai hku dawdan minute jahkrat dat ya ai lam chye lu ai.