Lu Pi Myen dap hpe KIA zing

Pang Wa ginra, Lu Pi NDAK hpyen dap hpe KIA ni zing madu la lu sai lam chye lu ai.

October shata 14 ya shana maga, Lu Pi mare kaw dap jung nga ai, gumshem Myen hpyen dap n-pu, NDAK masat 1002 Lu Pi hpyen dap hpe KIA pawng hpawm hpyen hpung ni zing madu la lu sai lam, lit nga ai salang ni kaw na chye lu ai.

Ndai hpyen dap hpe October shata praw 9 ya shani kaw nna, KIA pawng hpawm hpyen hpung ni htim gasat wa ai hta 14 ya shani padang dip zing la lu sai lam chye lu ai.

Ya aten Pang Wa ginra hta gumshem Myen hpyen dap kawn hpyen n-gun jat bang  ai lam ni galaw nga ai sha n-ga, gumshem Myen hpyen dap, NDAK pawng hpawm hpung ni hte KIA ni hpyen masa shaja hkat nga ai rai nna, gasat gala majan mung matut byin wa mai ai lam chye lu ai.