Lucky men hotel kaw shara la nga ai gumshem Myen hpyen hpe KIA gasat zing
KIA Masat (9) Dap Ba, Hpakant Seng Tawng Lucky men hotel kaw makoi rawng nga ai, gumshem Myen hpyen hpe KIA ni gasat jasan kau sai lam chye lu ai.
October shata praw 8 ya jahpawt hkying 8:40am aten daram hta Seng Tawng Lucky men hotel kaw makoi rawng nga ai, gumshem Myen hpyen hpe KIA pawng hpawm hpyen hpung ni gasat zing jasan kau sai lam, lit nga ai salang langai tsun ai.
Gumshem Myen hpyen dap maga gaw, Seng Tawng ginra nhkrat sum na matu nbungli, laknak kaba ni hte shani shagu ngu na gap gasat ai lam galaw nga ai raitim, KIA pawng hpawm hpyen hpung ni zing madu la lu sai lam chye lu ai.
Seng Tawng ginra hta KIA hte gumshem Myen hpyen dap ni laiwa sai, September shata praw 7 ya shani kaw nna, gasat gala majan laja lana bai byin wa ai hta dap shara nkau hpe KIA ni zing madu la lu ai hpang, Lucky men hotel kaw makoi rawng nga ai, gumshem Myen hpyen hpe bai zing jasan ai re lam chye lu ai.
Ndai gumshem Myen hpyen ni gaw, hotel kata nga ai mungshawa ni hpe rim sharawng ai lam, Seng Tawng ginra mungshawa ni a dum nta hpe wan nat jahten ai lam ni galaw nga ai hpyen hpung re hpe mung matut chye lu ai.
