Lung Bra mare kaw gasat gala majan byin
KIA Masat (9) Dap Ba ginra, Hpakant Lung Bra mare kaw KIA hte gumshem Myen hpyen dap ni gasat gala majan byin ai lam chye lu ai.
March shata 22 ya shani Hpakant lung wa lam, Lung Bra mare makau grup yin kaw KIA pawng hpawm hpyen hpung ni hte gumshem Myen hpyen dap ni gasat gala majan byin ai lam, lit nga ai salang ni kaw na chye lu ai.
Hpakant Lawnghkang Sha-it Yang (Ley Pin) bawm yam dap kaw na yu wa ai, gumshem Myen hpyen dap n-gun (30) daram, KIA pawng hpawm hpyen hpung ni shara la nga ai de hpyen shamu shamawt wa ai majaw, gasat gala majan byin wa ai re lam chye lu ai.
Ya aten Hpakant ginra hte Waimaw ginra ni hta mung, gumshem Myen hpyen dap ni hpyen shamu shamawt n-gun jat bang ai lam ni galaw nga ai majaw, gasat gala majan ni byin nga ai hpe chye lu ai.
Matut nna Manmaw ginra hta mung KIA pawng hpawm hpyen hpung ni hte gumshem Myen hpyen dap ni shani shagu gasat gala majan laja lana matut byin nga ai lam chye lu ai.
