Lung Ja Bum mayan hta gumshem Myen hpyen dap hte KIA ni gasat gala majan matut byin
KIA Masat (3) Dap Ba, Masat (15) Dap Dung ginra, Lung Ja Bum mayan hta November shata praw 2 ya jahpawt hkying 10:00am aten kaw nna, gumshem Myen hpyen hpung hte KIA ni gasat gala majan matut byin ai lam chye lu ai.
“Laja lana rai gap hkat ai gaw, hkying 10:00am aten kaw na hkying 11:30am aten du hkra, nsim nsa ngoi bu ai” nga nna majan byin ai ginra na salang langai tsun dan ai.
Gasat gala majan byin ai hpang, Nmawk kaw dap jung ai gumshem Myen hpyen dap, Hk.M.Y (437) kaw nna, KIA ni nga Lung Ja Bum mayan de laknak kaba matut manoi gap bun nga ai re.
Gumshem Myen hpyen dap ni gaw, KIA ni nga ai shara de sha, laknak kaba gap bun ai nrai, mungshawa ni nga ai mare kahtawng de du hkra, hkrup mara gap shadam ai majaw, mare masha ni hkra hkala ai sha n ga, dum nta, nawku jawng wang, Ma Shalet jawng ni hkan myok pala si hkrat kapaw nna hten za mat ai lam ni byin nga ai.
Dai ni November shata praw 2 ya shani hta mung, hka sang hpaw hte hpyen n gun matut jat lung wa ding yang re lam, ginra masha ni tsun ai.
KIA Masat (15) Dap Dung ginra, Lung Ja Bum mayan de, October shata 22 ya shani kaw nna, KIA nga ai shara de hpyen n gun tsa kaba hte htu shadut htim gasat lung wa ai majaw shani shagu ngu na gasat poi byin nga ai re.
