Lung seng n hkun hka lawng kata kaw mungshawa langai asak si sum taw nga

                                                   Photo Credit; EPN

Hpakant-Gwi Hka mare, lung seng n hkun hka lawng kata kaw December shata 11 ya jahpawt daw aten hta mying, asak garai nchye lu shi ai masha langai asak si sum taw ai lam na chye lu ai.

“Asak si sum ai wa a moi mang hpe gaw hka kaw mu la ai re. Lata hte lagaw kaw sumri hte gyit da ai, shi a lung seng htu ai nhtu gaw shingdu kaw hpye da rai nna hka ntsa kaw waw taw let si taw ai re” nga nna Gwi Hka mare na Salang Nhkum Tang Gun tsun dan ai.

December 11 ya jahpawt daw nhtoi htoi wa aten hta Lung seng sa htu ai ni mu nna langai hte langai shana let yawng chye lu ai raitim asak si sum ai wa hpe gaw ya aten du hkra kadai re ai lam nchye lu shi ai re.

“Ndai lam hte seng nna masha langai hte langai ga law hkat, nju ndawng hkat rai nna, shada makoi gyam sat hkat ai rai na nhten” nga nna salang langai masam maram tsun dan ai.

Mare salang ni kaw nna asak si sum ai wa gaw mying kaning nga ai, asak kade ning re hte hpakant gaw masha hpan hkum nga ai re majaw hpa baw amyu bawsang re ai, gara lawk kaw nga ai re hpe nchye lu shi ai rai nhtawm Seng ang ai salang ni hte balik dap ni kaw nna mung jep joi, sagawn nga ding yang re.

Gwi Hka mare salang ni kaw nna dinghku ni hta nta masha mat ai lam, lauban ni hta tinang a lung seng htu hkawng ma mat ai lam nga ai rai yang, mare uphkang rung de shana ya na matu mung tsun shana ai lam ni galaw nga ai re hpe chye lu ai.