Lung Sha Yang Hpak Ma kaw gumshem Myen hpyen ni hte KIA ni gasat gala majan byin
KIA Masat (1) Dap Ba, Masat (7) Dap Dung ginra, Lung Sha Yang Hpak Ma kaw February shata praw 7 ya jahpawt hkying 9:00am aten daram hta gumshem Myen hpyen, Pyi Tu Tsit pawng hpawm hpyen hpung ni hte KIA, PDF pawng hpawm hpyen hpung ni gasat gala majan byin ai lam chye lu ai.
Gumshem Myen hpyen dap hte Pyi Tu Tsit pawng hpawm hpyen hpung ni gaw, Putao maga na yu wa ai lam kaw ang katut gasat poi byin ai rai nna gasat poi byin ai shara de Machang Baw Myen dap kawn laknak kaba hte gap bun ai lam, shawng lam shiga lawk kaw na chye lu ai.
Ndai Masat (7) Dap Dung ginra hta February shata praw 1 ya shani hta mung Sum Pyi Yang, Shing Kap Bum hte Lung Sha Yang shara masum kaw aten langai hta sha, KIA, PDF pawng hpawm hpyen hpung ni gumshem Myen hpyen dap hpe htim gasat ai lam nga sai re.
Gunshem Myen hpyen dap ni kaw nna, Jet Fighter nbung li ni hte bawm wa jahkrat bun ai majaw, Sum Pyi Yang mare masha nkau mi hkra hkala ai sha n-ga dum nta ni mung hten za hkrum mat ai re.
Myitkyina gumshem Myen hpyen dap M.P.K Taimu kaw nna Nam Ya mare na Myen dap up wa hpe Hpakant lam mayan de, ginra jasan shang na re majaw mare kahtawng nkau na mungshawa ni hpe Seng Hpra mare, Kap Maw mare hte Nam Ya mare ni de htawt sit yen nga na matu tsun wa ai lam, buga masha ni tsun ai kaw na chye lu ai.
February shata praw 3 ya shani kaw nna, praw 5 ya shani du hkra KIA Masat (2) Dap Ba, Masat (44) Dap Dung ginra, Seng Hpra mare shing du, Manaw Maw mare makau Maisak sun kawng kaw gumshem Myen hpyen dap Hk.M.Y (111) dap na hpyen hpung ni hte KIA hpyen hpung ni gasat poi byin ai.
Gumshem Myen hpyen dap ni nbung li hte bawm wa jahkrat bun ai majaw, Kap Maw mare na mung shawa marai 2 asak si sum mat nna, marai 4 hkala hkrum ai hte dum nta ni mung hten za mat ai lam byin lai re hpe mung chye lu ai.
