Lung Sha Yang mare kata hpyen dap bai dung na matu, gumshem Myen hpyen dap ni hkyen lajang galaw nga

Putao Ginwang, Lung Sha Yang mare kata hta gumshem Myen hpyen dap ni hpyen dap bai dung na matut, hkyen lajang galaw nga ai re hpe chye lu ai.

December shata 10 ya shani hkan na gumshem Myen hpyenla ni Lung Sha Yang mare kata hpung hte hpung du wa ai rai nna, ya aten hpyen n-gun yawng 70 daram rai sai re lam, ginra masha langai tsun ai.

Hpyenla nkau mi hpung kyi jawng kaw yup rai nna, nkau mi gaw mare masha ni a dum nta kaw wa yup ai, Lung Sha Yang mare ka-ang kaw hpyen dap gap na matu, mung mare masha ni a hpun kawa ni hpe kran lang rai galaw nga ai re lam, ginra masha matut tsun ai.

Ya galaw ai hpyen dap shara gaw lai wa sai 5 ning daram hta gumshem Myen hpyen dap ni tawn kau da ai hpyen dap dingsa hta kalang bai wa dung na matu galaw nga ai re hpe chye lu ai.

Lung Sha Yang mare gaw Myitkyina hte Putao lam ntsa na mare rai nna, dai mare hta mungshawa yang hkying mali jan daram nga ai rai nhtawm, ya na zawn gumshem Myen hpyenla ni mare masha ni a dum nta hta wa yup ai majaw, mare masha ni hkrit tsang nga ai hpe matut chye lu ai.