Ma-U Pin mare masha ni a dum nta ni hpe gumshem Myen hpyen dap ni mara kata wan nat jahten

Hpakant lam Ma-U Pin mare masha ni a dum nta hpe February shata praw 7 ya shani hkying 10:00am aten daram hta gumshem Myen hpyen dap hte P.T.Ts pawng hpawm hpyen hpung ni mara kata wan nat jahten kau ya ai lam chye lu ai.

Gumshem Myen hpyen dap hte P.T.Ts pawng hpawm hpyen hpung ni hpyen n-gun 50 daram hte mare kata shang wa nna, sinat kaji kaba gap kapaw rai mare masha ni a nta 17 hpe wan nat kau da ya ai re lam, ginra masha ni kaw na chye lu ai.

Wan nat jahten kau hkrum ai dum nta ni gaw, Slg. Maran La Nu, Slg. A Ngye Le, Slg. Win Zaw, Slg. Hpukawn La, Slg. Wawne Yaw Han, Slg. Nhkum Brang Mai, Slg. Shan Lay, Slg. Awng Tin, Slg. Zinghtung La Nan, Slg. Hpaukawn Ahtawng, Slg. Ah Ji Gam, Slg. Hpaukawn Naw Li, Jan. Wawne Zung Sawng, Jan. Kareng Ah Tawng, Jan. Hpaukawn Ahtang, Jan. Sau Nam hte Jan. Nhkum Roi Ja ni a dum nta ni hpe wan nat jahten kau ya ai re lam, ginra masha langai tsun ai.

Dum nta ni hpe wan nat jahten kau da ya ai sha n-ga, Ma-U Pin mare na Slg. Zahkung La, Slg. Zaw Win Mawng, Slg. Zaw Win Awng hte Rev. Lahi Tu Lum ni hpe mung rim woi mat wa ai re lam chye lu ai.

Mare masha ni a dum nta ni hpe wan nat kau da ya ai ni gaw, Kamaing Byuha kaw dap jung nga ai gumshem Myen hpyen dap hte gumshem Myen hpyen dap npu na Sam hkyeng P.T.Ts pawng hpawm hpyen hpung ni re lam chye lu ai.