Madi Yang hte Ja Pu Sama lam numshe maga de gasat gala majan matut byin
Ginjaw ginra, Madi Yang hte KIA Masat (1) Dap Nawng Daju ginra, Ja Pu Sama lam numshe kaw, September shata praw 6 ya shani gumshem Myen hpyen dap hte KIA ni gasat gala majan matut byin ai lam chye lu ai.
Madi Yang mayan kaw shamu shamawt rawng nga ai gumshem Myen hpyen dap ni hte KIA ni, dai ni hkying 11:30am aten daram kaw nna, gasat gala majan matut byin nga ai re.
Ja Pu, Sama lam numshe mayan hta mung, dai hpawt hkying 5:00am aten daram kaw nna, laja lana gasat poi byin ai lam, shawng lam na lit nga ai salang ni kaw na chye lu ai.
Manmaw maga de na lung wa ai gumshem Myen hpyen modo hpung ni hpe mung, September shata praw 6 ya jahpawt daw hta Loi Jaw Kadawng kaw KIA ni bawm hte hkap gap gasat ai lam chye lu ai.
Manmaw, Myitkyina modo lam hku nna, KIO ginjaw ginra de July shata praw kaw nna, gumshem Myen hpyen dap ni htu shadut shang wa ai majaw, shani shagu ngu na gasat poi byin nga ai hta Myen hpyen dap ni gaw, hpyen gasat nbungli ni hpe jai lang let gasat nga ai re.
