Madi Yang makau kaw gumshem Myen hpyen dap hte KIA ni gasat gala majan byin

Ginjaw Ginra, Madi Yang mare makau kaw, August shata praw 2 ya jahpawt hkying 8:30 am aten daram kaw nna, gumshem Myen hpyen dap hte KIA ni gasat majan byin nga ai lam, shawnglam shiga lawk kaw na chye lu ai.

Ginjaw Ginra rai nga ai Nam San Yang hpyen man maga de, gumshem Myen hpyen dap ni htu shadut chyinglau shang wa ai majaw, lai wa sai July shata praw 3 ya shani kaw nna, gasat gala majan numdaw mi bai byin wa ai re.

Manmaw, Myitkyina modo lam hku nna, gumshem Myen hpyen dap ni hpyen n gun matut jat nga ding yang re majaw, lahkawng maga hpyen masa naw shaja hkat nga ding yang re hte, gumshem Myen hpyen dap ni gaw gasat gala majan byin ai shara de, nbungli hte bawm wa jahkrat bun ai, Laiza makau grup yin shara ni de laknak kaba hkrup mara gap bun nga ai lam hpe mung chye lu ai.

Mungmyit Sinli Ga (Kachin Sub-State), KIA Masat (6) Dap Ba, Masat (9) Dap Dung ginra, Je Lan mare makau kaw August shata praw 2 ya shani hkying 11:00am aten daram kaw nna, gumshem Myen hpyen dap hte TNLA ni gasat gala majan byin ai lam chyen lu ai.

Gasat gala majan byin ai shara de Maile (105) kaw na laknak kaba hte  hkrup mara gap shadam nga ai lam, buga masha ni kaw na chye lu ai.