Madu jan hpe sat kau da ai madu wa hpe tam sagawn nga

Gang Dau Yang Ginwang Daw, Mali Ninghtawn, Maga Yang hpyen yen dabang, lawk 6 kaw shanu nga ai madu jan Sagri Ja Hpang hpe sat kau da ai madu wa Maran La Nu hpe seng ang ai ni kaw nna tam sagawn nga ding yang re hpe na chye lu ai.

Sat hkrum ai Jan Sagri Ja Hpang asak 38 ning gaw kasha marai 4 a kanu re lam, madu wa Maran La Nu (asak 35 ning) gaw madu jan hte manghkang byin ga shalai hkat ai majaw, madu jan hpe July shata 24 ya shana hkying 7:00pm aten daram hta nhkyi hte 26 lang daram galun sat kau da nna hprawng mat ai re lam chye lu ai.

Ya aten Salang Maran La Nu hpe Ginwang Daw Uphkang Rung hte Dabang Komiti ni kaw nna tam sagawn nga ding yang rai nna, ndai amu hte seng nna mung Laiza Ginwang hte Gang Dau Yang Ginwang Daw kaw nna lit la hparan sa wa na re lam chye lu ai.

Maran La Nu gaw tsa lu tsa sha rai nna ding hku kata manghkang amyu myu shabyin ai majaw, dabang komiti kaw nna lang hte lang sharin shaga ai lam nga sai raitim, galai shai wa ai lam nnga ai majaw, dabang komiti kaw nna shi a akyang lai len galai shai wa ai du hkra sharin shaga na matu 2019 ning November shata 29 ya shani ginwang daw uphkang rung de ap da ai lam nga ai hta, dum nta de gan yu wa ai shaloi madu jan hte dinghku manghkang hte seng nna moi na lam tsun alun ga shalai hkat ai majaw, ya na zawn byin mat ai re lam, dabang komti ni tsun dan ai kaw na chye lu ai.