Maga Yang hpyen yen dabang hta ga sharut gyi nna, hpawmi langai asak si sum

Maga Yang hpyen yen dabang (IDPs) hta August shata 12 ya shani marang kaba htu sawng ai majaw, jahpawt hkying 8:00am aten ga sharut gyi wa nna, asak (28) ning re hpawmi langai asak si sum mat ai lam chye lu ai.

“N-ta ntsa de n-gam re majaw n-ta hte hpawn rai mat ai​, asak (80) ning re gamoi hpe hkye ai kaw asak si sum mat ai re” nga nna Maga Yang hpyen yen Dabang Up Salang Kaba U Sing Tang Gun tsun ai.

Asak si sum mat ai hpawmi jan gaw kasha (3) a kanu rai nna, shi a moimang hpe dabang komiti rung hta tawn da nhtawm, hpawt ni makoi mayang na re lam, Salang Kaba matut tsun ai.​

Ga sharut gyi ai hta, n-ta 5 hten za mat nna, nga shara n-ta ni hte lu hka, shadu lu shadu sha na hka ni yak hkak taw nga ai re hpe chye lu ai.

Ya aten marang matut manoi naw htu taw nga ai majaw, dabang mung shawa ni hpe shimlum lam lu na matu, nawku jawng hkan kahkyin tawn da ai lam matut chye lu ai.