Magam gun dinghku pawnghpawm hkungran ga shaka la akyu hpyi hpawng galaw
Wunpawng Mungdan Shanglawt Hpung Ginjaw Komiti kaw nna lam masan ya ai hte Ningawn Daju Komiti ni tatut hkrang shapraw woi awn galaw ya ai magam gun dinghku pawnghpawm hkung-ran ga shaka la akyu hpyi hpawng hpe November shata praw 6 ya jahpawt hkying 9:00am aten hta, Laiza manau wang Sinpraw Majoi Gawknu, Masat (5) Dapba Padang Ninghkawng Gawknu, Laiza Buga Hkalup Hpung Htoi Ninghkawng Gawknu hte Laiza Jau Ginwang Hkristu Hkawhkam Masat Htingnu ni kaw galaw la lu sai re.
Wunpawng Mungdan Shanglawt Hpung Ginjaw Komiti Tingnyang Up Du Daju Jum Nban La kaw nna mung, hkungran ga shaka la ai magam gun dinghku ni hpe hkung-ran ga shaka jaw ai yaw shada lam hte pawnghpawm hkung-ran ga shaka jaw ai lam gaw KIO hpung pati a shamu shamawt ai lam re. Dai ni ga shaka hkamla ai kun dinghku ni yawng ngwi pyaw ai hkristan dinghku ni rai u ga nga nna tsun ai hta,
“Kun dinghku gaw de ra, de taw nga, tara shang galaw na matu lam amyu myu a majaw yakhkak nga ai myit rum share ni hpe Karai Kasang a man, shinggyim wuhpung wuhpawng a man tara shang ai kun dinghku byin tai na matu galaw ya ai lam re. KIO mung masa pati kaw gaw nlawm ai raitim, shinggyim nau na myit hte Ginjaw Komiti kaw na jasat nna galaw ya ai lam re ngu hpe chye na da ra ai” nga nna tsun ai.
Magam gun pawnghpawm hkung-ran ga shaka la hpawng galaw ai hta, Sinpraw Majoi Gawknu kaw htinggaw-22, Ginjaw Ginra Ginwang Ginjaw Masat (5) Dapba Padang Ninghkawng Gawknu kaw htinggaw 17, Laiza Buga Hkalup Hpung Htoi Ninghkawng Gawknu kaw htinggaw-16 hte Laiza Jau Ginwang Hkristu Hkawhkam Masat Htingnu kaw htinggaw-21, hkung-ran ga shaka hkamla ai htinggaw yawng 76 re.
COVID-19 ana byin nga ai aten ladaw re majaw hkungran ga shaka jaw hpawng hpe shara 4 garan nna, Hpung Up Sara, Wa Jau ni kaw nna hkungran ga shaka jaw ya ai re.
