Magam gun jan hkrumzup hpawng galaw
Wunpawng Mungdan Shanglawt Amyu Shayi Hpung Ginjaw Komiti kaw nna woi awn nhtawm, January shata 28 ya jahpawt hkying 9:00am aten kawn magam gun jan hkrumzup hpawng lamang hpe, Ja Htu Kawng Goft pa kaw galaw ai lam chye lu ai.
Ndai hkrumzup hpawng hta Karai Kasang kaw akyu hpyi n gun la ai lam, Amyu Shayi Hpung Ginjaw Komiti Ningbaw a mungga hti ai lam, laksan n gun jaw mungga tsun ai lam, hta hkrup sindan pa (Me) manaw ai lam hte ginsup lamang ni lawm ai re.
Du Kaba Maran Tawng La (Awn Up Daju) kaw nna, magam gun jan ni hpe n gun jaw shatsam mungga hpe ndai zawn tsun ai.
“Dai ni anhte madung ra sharawng dik ai magam bungli gaw, rawt malan majan ndai hpe awng dang ai hte lawan ngutkre na hpe ra sharawng ai lam rai na re. Shawnglam de tsap nga ai Shanglawt hpyen la ni, Shanglawt magam gun ni hpe madi wa daw tai ai hta grau nna, nanhte kanu num ni nan nanhte amyu shayi ni nan, nanhte magam gun jan ni nan ndai Shanglawt majan kaw tatut shanglawm nga ai ni nan rai sai” nga nna ra mara hpe hpaji jaw n gun jaw shatsam mungga tsun ai.
Hpawmi Lahpai Seng Raw (Amyu Shayi Hpung Ginjaw Komiti Ningbaw Malai I) kaw nna mung, magam gun jan hkrumzup hpawng a yaw shada lam hpe ndai zawn tsun ai.
“Dai ni na hkrumzup ai hpawng hpe anhte Amyu Shayi Hpung Ginjaw Komiti kaw nna, yaw shada lam (6) hte ndai lamang hpe galaw ai lam rai mali ai. (1) Magam gun jan ni tinang dinghku hta yak hkak ai, myit ru myit tsang lam ni grai law hkra nga na re. Dai majaw lani mi sha pyi myit n gun awai la lu ai, myit shapyaw ya lu ai lamang rai lu na matu. (2) Nhkrumzup ai magam gun jan ni shada hkrumzup let, n gun la lu na matu. (3) Magam gun jan ni rau, hkrumzup nna, grau magyep kap let, ra wa ai aten hta shada pawnba garum shingtau hkat lu na matu. (4) Rawt malan magam gun jan langai a ahkyak ai lam ni hpe bai myit dum lu na matu. (5) Shawnglam hta greng grak ai magam gun jan ni law htam jat wa nna, myuhte mungdan lawt lu na magam bungli lam hta n gun hpungtun kaba hte madi shadaw shanglawm lu ai de du wa lu na matu. (6) Dai ni ndai hpawng hta du sa ai magam gun jan ni yawng, anhte tsawra hkungga ai Amyu Shayi Hpung Ginjaw Komiti Ningbaw a shatsam mungga hte Awn Up Daju, Du Kaba a mungga hpe na la nna, magam gun jan prat, tinang a shawnglam a matu n gun dating lu na lam hta shakut shaja ai atsam marai lu la na matu, ndai lamang hpe galaw ai lam rai mali ai” nga nna tsun ai.
Ndai zawn magam gun hkrumzup hpawng lamang hpe tinang na seng ang ai Ginwang, Ginwang Daw, Ninghtawn, mare Amyu Shayi komiti kaw nna woi awn let galaw ai lam ni mung nga ai. Ndai lamang hpe shaning shagu galaw ai lam nga ai raitim, lai wa sai lahkawng ning hta gaw, COVID-19 ana zinli a majaw n lu galaw byin mat ai. Ya matut nna ndai hta grau tang du ai hkrumzup hpawng ai lam ni hpe galaw sa wa na matu masing ni nga ai lam, Hpawmi Lahpai Seng Raw matut tsun ai.
Magam gun jan hkrumzup hpawng hta magam gun jan ni yawng marai (1500) daram sa du shanglawm sai re. Ndai magam gun jan hkrumzup hpawng lamang hpe dai ni na aten langai hta sha, Laiza Ginwang Amyu Shayi Komiti ni woi awn nhtawm, Pajau Zinlum hta mung galaw ai lam chye lu ai.
