Magam gun jan ni a n gun awai wunli sharawt akyu hpyi hpawng galaw
KIA Masat (2) Dap Nawng Daju kata na, Ginjaw Makawp Masat (23) Dap Nawng Dap Dung, Padang Wunli Gawknu kaw August shata 28 ya jahpawt hkying 10:00am aten hta magam gun jan ni a n gun awai wunli sharawt akyu hpyi hpawng hpe galaw la lu sai re.
Magam gun jan ni a n gun awai wunli sharawt akyu hpyi hpawng a yaw shada lam hpe Masat (23) Dap Nawng Dap Dung Up, Du Kaba Hkumboi Zau Seng kaw nna ndai zawn tsun ai.
“Anhte magam gun jan ngu ai ni gaw, madu wa nnga ai kaw dinghku hpe ngang ngang tek jum ai magam gun dinghku ni re. Madu wa ni gaw shawng lam de amyu hte mungdan a matu tsap nga ai magam gun ni re. Kanu kawa machyi ai ten, kashu kasha machyi ai ten madu jan machyi ai ten ntsa de ahkang hpyi yang, masa sat lawat hta hkan nna ahkaw ahkang hprai jaw ai lam nnga ai.
Dai majaw kanu kawa ni myit garen gari let myit simsa ai lam nlu ai, madu wa lu nga ninglen nlu ai zawn gaida zawn nga ra ai, ndai zawn hkamsha ai tsin yam ni hpe Karai Kasang kaw na myit shalan ya u ga, magam gun jan ni yawng gaw, myit marai ngangkang ai hte madu wa ni galoi she wa na ngu ai hpe ala let, ngwipyaw hkam kaja, lu sut lu su nga mu nga mai ai chyeju hpe hkamla ai magam gun dinghku ni rai u ga ngu yaw shada let galaw ai rai mali ai”
Ndai zawn magam gun jan ni hpe n gun awai wunli sharawt akyu hpyi ai hpawng hpe shawng ningnan lang galaw ai re hte hpawng hta nawku hpung woi sara/num ni, Masat (2) Dap Nawng Daju, Dap Up Dukaba hte magam dap makan dap hkan na du sa ai magam gun ni, magam gun jan ni yawng marai 50 daram sa du shang lawm ai lam chye lu ai.
