Mai Ja Yang Buga Hkalup Hpung Sasana Boarder hta jawngma hkap la nga sai
Mai Ja Yang Buga Hkalup Hpung kaw nna hpaw ninghtan tawn da ai Sasana Boarder kaw nga nna jawng lung hpaji sharin la mayu ai jawngma ni a mying jahpan hpe July shata 17 ya shani kaw nna hkap la hpang nga sai lam chye lu ai.
Boarder hta tsang 5 kaw nna tsang 10 du hkra jawngma yawng marai 60 hkap la na rai nna, Boarder shabrai hpe tsang 9, 10 gumhpraw Yuan 3000, tsang 5 kaw na tsang 8 du hkra, Yuan 2000 bang ra na re, boarder nga shabrai hpe masa hta hkan nna numdaw 2 lang, 3 lang hkap la na re lam chye lu ai.
Laiwa sai shaning hta gaw Boarder shabrai hpe tsang 5 kaw na tsang 8 du hkra rai yang jawngma langai Yuan 3000, tsang 9, 10 marai langai Yuan 4000 bang ra ai hta, daining gaw COVID-19 aten ladaw re majaw, jawngma ni hpe hpaji lam hta madi shadaw ai hku nna jawngma marai langai mi hpe Yuan 1000 sha yawm ya ai hta, dai Yuan 1000 hpe buga hpung kaw nna garum jaw na re hpe chye lu ai.
Mai Ja Yang Buga Hkalup Hpung Sasana Boarder hpe lai wa sai 2009 ning kaw nna hpaw ninghtan da ai rai nna, Mai Ja Yang kaw jawng sa lung ai sumtsan shara shagu kaw na nga shara yak hkak ai jawngma ni ndai sasana boarder hta sa nga let hpaji sharin la lu na matu yaw shada re lam, Mai Ja Yang Buga Hpung Amu Madu Sara Jangma Htoi Nan tsun ai kaw na chye lu ai.
Boarder nga na jawngma ni gaw tinang lang na arung arai la sa ra na rai nna, sai jep lakmat lawm ra na hte sumtsan kaw na jawngma ni hpe Quarantine hkamla ngut hpang Boarder kaw hkap la na re hpe chye lu ai.
Mai Ja Yang Buga Hpung Ma shalet jawng hta mung, Ma shalet jawng lung na jawngma marai 60 a mying jahpan hpe July shata 20 ya shani kaw nna 26 ya shani du hkra mying hkap la sa wa na re lam, Ma shalet jawngma langai jawng shang gumhpraw Yuan 370 bang ra ai hta Yuan 340 sha hkap hta la na rai nna, jawng lung mat wa ai hpang ngam ai gumhpraw hpe shata shabrai hku nna jawngma langai mi shata shagu Yuan 150 bang ra na re lam, Sara Jangma Htoi Nan matut tsun ai kaw na chye lu ai.
