Mai Ja Yang College a (3) lang na janmau shagrau hpawng galaw

Wunpawng Mungdan Shanglawt Asuya kaw nna, hpaw sharin nga ai Mai Ja Yang College a (3) lang na janmau shagrau hpawng hpe April shata praw 4 ya shani hkying 11:00am aten, Mai Ja Yang muklum Mungzup Gawknu hta galaw la lu sai lam chye lu ai.

Wunpawng Mungdan Shanglawt Kongsi, Ningbaw Malai, Du Kaba Sumlut Gun Maw a shatsam mungga hpe Mai Ja Yang College jawng up Sara Kaba Dr. Hpala Zau Jat hti shalai ya ai hta “Mai Ja Yang College kaw na gaw mungdan a hpaji lam sharin ya ai sha n-ga, Myit masa hpawng chyawm shamu shamawt ai jasat jasa madat mara lam ni hpe mung shaman shakyang ya dat ai re. Amyu hpe tsawra ai myit, mungdan hpe makawp maga na myit ni hpe mung, tinang mu mada ai daram, atsam dat lu ai darma ang ai bungli ni hpe htep lahti gun hpai na hpe myit mada ga ai” nga nna tsun ai.

Mai Ja Yang College gaw nau nna yang Mai Ja Yang dakkasu madang de shatsaw sa wa na matu, Wunpawng Mungdan Shanglawt Kongsi myusha hpaji masa woi awn komiti kawn masing jahkrat da sai re, Mai Ja Yang College a magam bungli ni hkrang masan ngang kang wa nna lu galaw wa ai shaloi, masa amyu myu a majaw janmau nlu shi ai magam ni hpe janmau lu jaw hkra shakut sa wa na lam Sara Kaba  tsun ai.

Janmau shagrau hkamla sai jawngma ni gaw marai 44 rai nna, jawng lung ladaw hpe 3 ning masat da ai, Mai Ja Yang College hpe 2015 ning September shata kaw nna hpaw sharin nga sai re.