Mai Ja Yang IEd jawng hta jawngma mying jahpan hkap la nga sai

2021-2022 ning hpaji ladaw a matu Mai Ja Yang IEd (Institute of Education) jawng hta jawngma mying jahpan shawk shawn form hpe May shata 25 ya shani kaw nna June shata 13 ya shani du hkra hkap la sa wa na re lam, Mai Ja Yang IEd jawng kaw na chye lu ai.

Shawk shawn form hpe Mai Ja Yang Institute of Education Facebook page hta Download, Coppy galaw la nna email hku shawk shawn mai ai sha n-ga, Laiza Muklum Ginjaw Hpaji Dap hte IEd jawng hta sa la nna mung shawk shawn mai ai.

Jawngma ni hpe Interview galaw na gaw June 14, Placement & Entrance test galaw na gaw June 15, Orientation galaw na gaw June 16 ya shani rai nna, mayak manghkang kaga nnga ai rai yang 2021-2022 ning hpaji ladaw hpe June shata 17 ya shani kaw nna hpaw sharin sa wa na re lam, IEd jawng up tsun ai.

Jawng lung jarik hpe laning mi a matu Miwa gumhpraw Yuan 1800 masat da ai rai nna, boarder nga na jawngma ni gaw lu sha manu Yuan 1900 laksan bang ra na re lam chye lu ai.

Ndai jawng hta tsang (10) awng sai ramma ni hte Janmau gup sai ramma ni sa mai hka ja ai rai nna, Pre-Class (English, Chinese), Diploma in English, Diploma in Chinese hte Diploma in Education program (4) kaw na tinang lung mayu ai hpe lata la nna sharin achyin la mai ai.

Hpaji jawng ni hta tatut sharin sara galaw nga ai lahta tsang sharin sara ni hpe mung June shata kaw nna October shata du hkra teaching training hpe shaning shagu sharin achyin ya na rai nna, 2021-2022 ning jawng lung ladaw a matu Scholarship hpe mung May shata 26 ya shani kaw nna June 10 ya shani du hkra shawk shawn mai ai.

Wunpawng Mungdan Shanglawt Asuya, Ginjaw Hpaji Dap hku nna mung jawng sara sharin achyin ladat hte seng ai hpe madung dat taw ai re majaw, academic kaw ningtawn ai, myit lawm nna atsawm dat shakut shaja mayu ai jawngma ni hpe IEd jawng hta ra sharawng nga ai lam, IEd jawng up tsun ai kaw na chye lu ai.

Photo; MIEd