Mai Ja Yang, MIEd jawng kaw htunghking hte seng ai sharin hpawng lamang galaw

Wunpawng Mungdan Shanglawt Asuya, Htunghkying hte Laili Laika Magam Dap kaw nna, Htunghking hte seng ai sharin hpawng lamang hpe Mai Ja Yang MIEd jawng kaw galaw nga ai lam chye lu ai.

February shata 12 ya shani kaw nna 14 ya shani du hkra sharin sa wa na rai nna, jahpawt hkying 9:00am aten kaw na shana de hkying 5:00pm aten du hkra, Mai Ja Yang MIEd jawng kaw sharin nga ai lam chye lu ai.

Ya na zawn sharin ya ai a yaw shada lam hpe Wunpawng Mungdan Shanglawt Asuya, Htunghking hte Laili Laika Magam Dap, Ningtau Amu Madu, Du Kaba Lahpai Zau Tang tsun ai hta

“Mungkan hpungtang hpaji kade chye tim, tinang amyu a hkringhtawng htunghking ni nchye jang masha ni man kaw ga shaga wa yang, tinang a lam san wa yang bai nlu tsun dan, tinang gaw masha ni a lam hkrai hkaja hkawm yang nmai ai, kaning re mungkan hpaji sharin hkawm ai raitim, tinang amyu htunghking a lam chye ra ai ngu na sharin dan, tsun dan ai lam re” nga nna tsun ai.

Wunpawng Mungdan Shanglawt Asuya Htunghking hte Laili Laika Magam Dap, Lit Hkam hte Ningtau Amu Madu kaw na sharin ya ai hta Numwawn numla lam, Magun shat lit hte seng ai lam, Manau Majun htawngka hte seng ai lam ni hpe sharin ya ai re lam, Du Kaba matut tsun ai.

Htunghking hte seng ai lam hpe lai wa sai ten, Laiza lahta tsang jawng hte Amyu Shayi Ginjaw Rung ni hta sharin ya sai lam nga ai rai nna, Dakkasu kaw gaw ya she nnan sharin hpang wa ai re lam chye lu ai.

Matut nna Wunpawng Mungdan Shanglawt Asuya hpaji jawng ni hta htunghking hte seng ai lam hpe jawng kaji kaw na tsang (10) du hkra, sharin ginhpan langai hku na sharin sa wa na lam nga ai hpe chye lu ai.