Mai Ja Yang (MIEd) jawng kaw jawng mying hkapla hpang sana
Mai Ja Yang Institude of Education (MIEd) 2020-2021 jawng lung ladaw hpe May shata praw 1 ya shani kaw nna, jawng mying hkap la hpang sana re lam chye lu ai.
“Ya aten mungkan ting chyam bra nga ai ana a majaw yawng grai hkrit tsang ra nga ai re majaw, jawng hpaw nhtoi hpe tup hkrak lu hpaw na ngu tsun na yak nga ga ai, raitim gara ladat hte hpaw sa wa na ngu ai ladat gaw myit yu na lam re. Ya byin nga ai ana zinli masa hta hkan nna jawng pat ai ladaw na wa jang, online kaw na sharin hkaja ya lu na matu mung myit nga ga ai” nga nna Mai Ja Yang Institude of Education (MIEd) jawng up Sara Kaba Nnye La Raw tsun ai.
Online hku nna sharin achyin ya lu na matu dut dang yak hkak ai lam ni gaw nga ai raitim, ndai hpe byin hkra Ginjaw Hpaji Dap hte matut mahkai nna galaw sa wa na re lam, Sara Kaba matut tsun ai.
Jawng mying hpe May shata praw 1 ya shani kaw nna, June shata praw 9 ya shani du hkra aten jaw hkap la nhtawm, June shata 15 ya shani kaw nna laika sharin hpang na re lam chye lu ai.
Ndai jawng hta sharin ginhpan program mali nga ai rai nna, Pre-college (1 year), Diploma in Education (2 years), Diploma in Tesol (2 years) hte Diploma in Chinese (3 years) ni re.
Jawng lung ladaw hpe shaning shagu June shata kaw nna October shata hta kalang, December shata kaw nna April shata bat masum daram du hkra kalang masat da ai raitim daining gaw ana zinli a majaw, March shata kaw jawng dat kau ai re. 2019-2020 ning hpaji ladaw hta sharin hkamla ai jawngma yawng marai 470 jan re lam chye lu ai.
