Maigan de na du wa ai masha ni hpe Home Quarantine galaw
Putao kaw Covid 19 ana a majaw maigan mungdan kaw na du wa ai masha ni hpe tinang a dum nta kaw ana maram masam lam Home Quarantine galaw shangun ai lam, hkamja lam hte seng nna hpaji jaw hkaw tsun dan ai lam hpe laiwa sai bat kaw nna galaw nga sai lam chye lu ai.
“Putao Hkamja Dap hte tsi rung ni pawng nna, madung lawng lam 2 hpe galaw nga ai hta, Covid 19 ntsen nhten ai machyi masha ni nga wa yang tawn da na shara tsi rung langai lajang da ai lam, Covid 19 ana nbyin na matu gaw maigan mungdan kaw na du wa ai masha ni hpe nhtoi 14 ya ana maram masam ai lam ni galaw nga ai re” nga nna Putao Tsi Rung Up Dr. Thant Zin Tun tsun ai.
Ana maram masam na matu Home Quarantine galaw ai masha marai 70 daram nga ai kaw na marai 25 gaw nhtoi 14 ya maram yu ai shaloi ana nmu ai majaw tinang a mare kata hta wang lu wang lang hkawm sa na ahkang jaw sai rai nna, ngam ai masha ni hpe gaw hkring dat ni la nna jahpawt shana tsi rung kawn ding yang matut mahkai nna, masa lam ni san ai lam, shinggan de npru hkawm na matu galoi mung tsun shadum n gun jaw ai lam ni galaw nga ai re hpe chye lu ai.
Putao Lung Tsut mare IDPs kaw gaw laban nawku lamang ni hpe npat kau shi ai raitim, pru shang wang chyinghka ni hta masha pru shang jep chyoi ai lam ni galaw nga ai lam, IDPs na Salang langai tsun dan ai.
Putao ginra hta Covid 19 ana kap hkrum ai masha gaw grai nnga shi ai re, online ntsa kaw mara da ai shiga nteng ai ni hpe hti hkrup nna, hkrit kajawng ai lam nnga na matu mung Dr. Thant Zin Tun tsun da ai re.
Ya aten Myen Mungdan hta mung Covid 19 ana zinli kap ai masha marai 8 hpe jep mu sai lam, ana maram masam ai masha marai 370 hte ntsen nhten ai masha marai 2 jep mu ai lam chye lu ai.
