Majan a majaw asak 9 ning re ma langai pala hkra nna asak si sum
Masat (3) Dap Ba, Masat (1), Masat (15), Dap Dung ginra hte Masat (2) Dap Ba, Masat (11) Dap Dung ginra ni hta KIA hte Myen hpyen hpung ni gasat gala majan matut manoi byin nga ai rai nna, dai majan a majaw mungshawa langai asak si sum mat ai re.
Masat (2) Dap Ba, Masat (11) Dap Dung ginra hta Myen hpyen nbungli hte Sau htaw modo ni hpe KIA hpyen hpung ni hkap gap ai hta, Myen hpyen hpung ni kawn sinat kaji gap dumbre ai majaw dai makau grup yin hta yi galaw let nga ai Ake mare na Salang Tin Soe a kasha asak 9 ning re ai ma langai pala hkra nhtawm asak si sum mat ai lam, shawng lam shi sawk ni shana wa ai kaw na chye lu ai.
Masat (3) Dap Ba, Masat (1) Dap Dung ginra hta mung Madang Yang Myen hpyen dap hpe May 12 ya jahpawt hkying 7:10am aten kaw nna hkying 7:20am aten laman hta KIA hpyen hpung ni kawn sa htim gap ai rai nhtawm, hkying 10:26am laman hta Myen hpyen dap ni kawn Jet Fighter nbung li (2) hte bawm wa jahkrat ai re. Masat (15) Dap Dung ginra, Man Da Bum Myen hpyen dap hpe May 12 ya shani hkying 10:00am aten kaw nna hkying 11:30am aten du hkra, KIA hpyen hpung ni sa htim gap ai kaw nna laja lana gasat poi byin ai.
Dap hpang hkying 6:00pm aten kaw nna hkying 7:30pm aten du hkra KIA hpyen hpung ni kawn numdaw kalang bai sa htim gap ai hta, HK.M.Y (437) kata na hpyen hpung ni kawn sinat laknak kaba rai nga ai 105mm, 122mm ni hte Man Da Bum grup yin de gap bun ai re lam chye lu ai.
