Majan byin nga ai kahtawng 4 na mungshawa marai hkying 2000 jan nam kaw chyat rawng nga
Sinna ginwang ginjaw, KIA Dap Ba ( 2 ) ginra, Awng Lawt mare, Sut Ring mare, Sut Ra mare, Nawng Nyeng mare kahtawng 4 na mungshawa marai 2000 jan gaw Myen hpyen dap hte KIA hpyen dap ni laja lana gasat gala majan byin wa ai majaw, April 12 ya shani kaw nna, Awng Lawt mare lahta Kap Tup Ja Maw hkahku maga de hprawng yen nga ai lam, buga na salang langai shana wa ai.
Myen hpyen dap ni gaw, sinat kaba hte hkrup mara matut manoi gap bun nga ai majaw ya koi yen nga ai Kap Tup Ja Maw kaw nna, deng 2 daram tsan ai shara de bai htawt sit yen nga ai lam, salang wa tsun ai.
Mungshawa ni hpe Danai Muklum de wa na matu, April 12 ya shani nawku hpung shagu na hpung woi sara ni Danai D.K.Ts hpyen dap de sa tsun ai raitim, D.K.Ts Mu gaw “Ndai hte seng nna ngai nlu daw dan ai” ngu ahkyak nla ya ai sha nhtang kau ai lam na chye lu ai.
D.K.Ts Mu wa ahkyak nla ya ai majaw, chyat rawng nga ai mungshawa ni pru wa lu na matu, April 14 ya shani hta Jinghpaw Mungdaw Hkringmang Daju hpang de laika tang madun da ai lam chye lu ai.
