Maji Gung Myen dap hpe KIA ni padang dip la lu
KIA Masat (3) Dap Ba, Masat (27) Dap Dung ginra , Ulang Pa Ginwang, Maji Gung gumshem Myen hpyen dap hpe KIA ni padang dip gasat zing la lu sai lam chye lu ai.
Maji Gung gumshem Myen hpyen dap hpe KIA pawng hpawm hpyen hpung ni March shata praw (1) ya shani kaw nna, htim gasat nga ai hta dai ni March shata praw (3) ya shana hkying 6:00pm aten daram hta zep zi padang dip da lu sai lam, shawnglam na salang langai tsun ai.
Maji Gung htim gasat majan hta gumshem Myen hpyen dap a laknak kaji, kaba machyu pala hpyen arung arai law law padang dip la lu ai rai nna, ya aten hpyen dap jasan jaseng galaw nga ai lam, shawng lam salang matut tsun ai.
Ya htim gasat zing la lu ai Maji Gung hpyen dap gaw Manmaw, Mung Hkawng hte Kaihtik ginra ni hta ahkyak ai hpyen dap shara re lam chye lu ai.
Ya aten gumshem Myen hpyen dap ni shara jahkrat nga ai hpyen dap shara shagu ngu na hpe KIA ni langai hpang langai htim gasat nga ai rai nna, KIA hte gumshem Myen hpyen dap lapran lahkawng maga hpyen masa mung shaja hkat nga ding yang re hpe chye lu ai.
