Mali hka kaba wa ai majaw, Manmaw ginra kata hka hpyen hkrum ai htingaw nkau mi hpe htawt sit kau

Lamu marang htu sawng nna Mali hka kaba wa ai majaw, Manmaw hte ni nawn ai ေပါက္ကုန္း၊ သီရိဆင္ကုန္း၊ ခြန္သာ၊ ေညာင္ပင္သာ mare makau mayan kaw na hka lim ai htinggaw nkau mi hpe asuya masat da ai hpunghkyi jawng shara ni hta htawt sit ai lam galaw nga ding yang re hpe na chye lu ai.

Lamu marang maram masam dap kaw nna tsang ra madang hka masat shadang pe 1150 masat da ai hta, ya aten 1000 mi hkawt du taw sai lam, htawt sit da hkrum ai mung mare masha ni a ra mara lam ni hpe ni nawn ai lawk kaw na mare masha ni lit la lajang ya nga ai lam, buga masha langai tsun dan ai kaw na chye lu ai.

Laiwa sai shaning hkan gaw hka kaba nga ai aten laman, Manmaw Muklum kata na lawk shagu hpe malu masha lajang ya ai lam galaw ai rai nna, daining gaw gade ya du hkra hka kaba nga na re hpe nchye lu ai majaw, lawk shagu asuya hte seng ai ni matsun wa ai hta hkan nna galaw nga ai re lam, salang langai matut tsun dan ai kaw na chye lu ai.

Myitkyina, Le Kung mare kaw mung hka lim ai htinggaw nkau ni hpe July shata 10 ya shani Masat (1) Lawu Tsang jawng kaw htinggaw (17), hpungkyi jawng wang kaw htinggaw (14) htawt sit da ai lam nga ai rai nna, ya aten hka bai yawm wa sai re majaw, dum nta de wa sa na matu hkyen lajang nga ai lam, matut nna hka bai kaba jat wa ai lam nga ai rai yang yu gawn lajang na matu komiti hpaw tawn da sai hte mare kaw nna hpa ndang di lu ai rai yang, asuya de garum hpyi nhtawm, mare masha ni yawng jawm garum sa wa na matu hkyen lajang da ai lam, Myitkyina Le Kung mare uphkang salang tsun ai kaw na chye lu ai.

Ya aten Myitkyina, Manmaw, Shwe Gu, Putao, Yangon, hte Myen mung ginra kata mare law law hta hka kaba hka lim ai lam ni byin nga ai re hpe na chye lu ai.