Mali Nmai Zup madim gan jahkring tawn ai 7 ning hpring chyeju shakawn akyu hpyi hpawng galaw
Mali Nmai Zup madim gan jahkring tawn ai 7 ning hpring chyeju shakawn akyu hpyi hpawng hpe October praw 1 ya shani hkying 11:00am aten kawn hkying 3:00pm aten daram du hkra, Tanghpre mare hta galaw ai lam na chye lu ai.
Akyu hpyi hpawng lamang hpe Tanghpre Mali, Nmai buga masha ni woi awn nna galaw ai re. Ndai hka madim hpe U Thein Sein Gumsan Magam galaw ai ten gan jahkring tawn ai re. Ya 7 ning pi hkring hkra raitim mung, ya na NLD asuya ni ndai hte seng nna hpa mung ntsun, njahkring ya ai re majaw, akyu hpyi hpawng galaw let shawa n-gun madun, n-gun la ai hpawng re, nga nna hpawng hpe woi awn ai Jan. Nhkum Ja Hkawn tsun ai.
Ndai madim hpe njahkring dingsang ninghkap ai lam hpe matut galaw sa wa na matu bawngban da ai lam nga ai. Anhte buga masha ni hkrai nre sha lawu mung de na hka shi hka nu ni hte seng ai hpaji ninghkring ni, wuhpung wuhpawng yawng hkra hte ta gindun nna, galaw sa wa na re lam, Jan Nhkum Ja Hkawn matut tsun ai.
Hpawng lamang hta buga masha ni kaw nna Mali, Nmai Zup a labau hpe hkai ai lam, yu ngwi ninghkring Jan Pan ni mahkawn wa hkawn ai, yu ngwi ninghkring Maran Seng Naw mung, Mali hka hte seng ai n-gun jaw mungga shaga ai.
Akyu hpyi hpawng hta nawku hpung woi Sara ni, Hpaji ninghkring ni, Pati Salang ni, Hluttaw Salang ni hte buga masha ni yawng rai yang marai 2000 daram sa du shanglawm ai lam chye lu ai.
