Man Jak Pa kaw KIA hte gumshem Myen hpyen ni gasat gala majan byin
Mungmyit Sinli Ga (Kachin Sub-state), KIA Masat (6) Dap Ba, Masat (36) ginra hta shamu shamawt hkawm nga ai gumshem Myen hpyen ni hte KIA ni, July 18 ya shani, Man Jak Pa kaw gasat gala majan byin ai lam chye lu ai.
“Myen hpyen Dapnu (99) ngu maram ai hpyen n gun (100) daram re. Dai hpawt hkying 8 daram kaw na Da Lung maga hku, nam lam dawk lung wa ai hpe anhte Dap Dung (36) hpyen hpung ni hkap nga ai, Man Jak Pa kaw gale pru wa ai majaw, hkap shing la gasat poi byin ai re” nga nna shawng lam na lit nga ai Salang langai tsun dan ai.
Gasat poi gaw hkying 1:00pm aten kaw byin ai rai nna, minute 30 daram re lam, Myen hpyen ni matut htu lung wa yang gasat poi naw byin na re lam, Salang wa matut tsun ai.
July shata 15 ya shani hta mung, KIA Masat (10) Dap Ba, Masat (2) Dap Dung ginra, Man Je maga kawn pru wa ai Hk.L.Y (290) dap na hpyen n gun (110) daram hte KIA hpyen hpung ni Loi Lem Bum kaw laja lana gasat poi byin ai lam chye lu ai.
Gasat poi byin ai shara de, Mung Ji mare kaw dung ai gumshem Myen byuha dap kaw nna, laknak kaba 105mm hte gap bun ai lam chye lu ai.
