Man Jak Pa ntsa bum kaw KIA hte Myen hpyen ni gap hkat
Mungmyit Sinli Ga (Kachin Sub-state) KIA Dap Ba 6, Dap Dung 36 ginra, Man Jak Pa ntsa bum kaw, December shata 20 ya jahpawt hkying 8:16am aten hta KIA hte Myen Hpyen Dap, Dapnu (Tatma) 99 kata na hpyen hpung ni gap hkat ai lam na chye lu ai.
Myen hpyen hpung ni gaw KIA Dap Dung 36, Kung 1 hpyen hpung ni nga ai Man Jak Pa ntsa bum de shamu shamawt htu lung wa ai majaw, hkap gap dat ai kawn gasat poi byin ai re lam, shawng lam shi sawk ni kawn chye lu ai.
“Myen hpyen ni gaw hpyen man lahkawng hku nna htu lung wa ma ai, Maw Tawng Da Lung hte Dima maga hku hpyen n gun 300 daram, bai nna 105 mile Namtau maga hku nna n gun 100 daram hte htu lung wa ai” nga nna Dap Dung 36 na lit nga ai Salang langai tsun dan ai.
KIA Dap Ba 10 Dap Dung 2 ginra de mung, December shata 18 ya shani kawn Myen hpyen n gun 300 daram shamu shamawt lung wa sai rai nna, ya aten hta Mungne hte Mungji lapran, Na Yi bum npu kaw shara jahkrat nga ai Myen hpyen ni gaw, lai wa lai sa mungshawa ni hpe sawk jep nga ai lam, Mungne buga masha ni kawn chye lu ai.
December shata 20 ya dai hpawt mung Kutkai maga de na Myen hpyen modo 5 hta hpyen n gun hpring hpring Tamungne mare kaw wa htaw sa da ai lam matut chye lu ai.
