Man Lung lam numshe kaw gumshem Myen hpyen hte KIA ni gasat gala majan byin
Mungmyit Sinli Ga (Kachin Sub-state), KIA Masat (4) Dap Ba, Masat (8) Dap Dung ginra hta July shata 22 ya shana de hkying 2:26pm aten e, Man Lung lam numshe kaw gumshem Myen hpyen dap hte KIA ni gasat gala majan byin ai lam, shawnglam shiga lawk kaw na chye lu ai.
Gumshem Myen hpyen Hk.L.Y (290) dap na hpyen n gun marai (20) hpung ni KIA hpyen hpung ni nga ai shara de gale pru wa ai majaw, gasat gala byin ai re lam chye lu ai.
KIA Masat (4) Dap Ba, Masat (34) Dap Dung ginra, Te Ni hpunggyi jawng kaw du nga ai gumshem Myen hpyen n gun (50) daram hpung ni gaw, July shata 21 ya shani hkying 10:00am hte hkying 11:00am aten hta Ta Yet Cho maga de sinat kaba 60mm (14) lang hkrup mara gap shadam bun ai lam nga ai.
Ndai zawn sinat hkrup mara gap shadam bun ai majaw, Te Ni hte Ta Yet Cho lapran kaw lasi sun hta bungli galaw nga ai, Sam amyu sha marai lahkawng kaw pala hkyep hkra nna, marai langai asak si sum mat nhtawm, langai wa gaw hkala hkrum ai lam chye lu ai.
ေဒၚ စန္းစန္းလွုိင္ asak (35) ning gaw, pai lahpa kaw hkra hkala ai raitim nsawng ai, ေမာင္ေအာင္မ်ဳိးထုိက္ asak (14) ning gaw du kaw hkra ai majaw si sum mat ai lam, shawng lam shi sawk ni kaw na chye lu ai.
Ya aten hta gumshem Myen hpyen dap ni gaw, KIA ni nga ai shara shagu ngu na de hpyen shamu shamawt lam ding yang ngu na galaw nga ai majaw, gasat gala majan mung shani shagu ngu na byin nga ai re.
Gasat gala majan byin ai hta gumsem Myen hpyen dap ni gaw, majan gasat nbungli ni jai lang ai sha n ga, sinat kaba ni hkrup mara gap shadam bun ai majaw mungmare masha ni hta hkra hkala si sum mat ai lam ni jahkring hkring byin nga ai hpe mung chye lu ai.
