Man Pying mare na hpyen yen mungshawa ni Man Kawng mare de bai wa
Majan a majaw hpyen koi yen hkrum nga ai Man Pying mare na mungshawa marai 200 jan daram, September 16 ya shani hkying 4:30pm aten hta Man Kawng mare de bai wa sai lam chye lu ai.
“Man kawng mare makau grupyin hkan chyawm gaw laknak lang ai wuhpung wuhpawng gaw nnga ai hku re. Bai nna mani kaw nna daini du hkra gaw kaga gasat gala majan byin ai lam nnga sai re hte ya na COVID-19 ana hte seng nna tsang ai re majaw ya na zawn hkyen lajang ai lam re ” nga nna Man Pying mare na Salang Maran Tang Nau tsun dan ai.
Mungmyit Sinli Ga (Kachin-Sub-state) Munggu Ginwang, KIA Dap Ba 6, Dap Dung 36 ginra, Man Kawng mare ntsa kaw, MNDAA hte AA dap hpawm ni Myen hpyen dap ni hte gasat gala majan byin ai majaw, September shata 11 ya shani kaw nna, Man Pying mare de hpyen koi yen htawt sit ai re.
Man Pying mare makau hte deng mi daram tsan ai shara hta Myen hpyen hpung ni lai yu wa nga ai lam ni mung naw nga taw ai raitim mare kata mungshawa ni hpe shaga woi mat wa ai lam ni gaw kaga nnga shi ai re lam mare masha ni tsun dan ai.
Ya aten Mungbaw grupyin kata hte Kutkai-Muse mawdaw lam lapran kaw mung shamu shamawt ai hpyen hpung ni naw nga taw ai lam mare masha ni tsun dan ai kaw na chye lu ai.
