Man Pying mare na salang langai, sinat machyu gap bun hkrum

Mungmyit Sinli Ga (Kachin-Sub-State) Munggu Ginwang, Man Pying mare kaw September shata 28 ya shana daw hkying 2:00pm daram aten hta wunpawng la langai mi hpe dap mying nchye lu ai Myen hpyen la ni sinat hte gap bun jahkrit ai lam buga masha ni shana wa ai kaw nna chye lu ai.

 “Myen ni yu wa ai ten shi hte loi mi tsan ai kaw hkrum hkat sam ai gaw, hkrum jang she shi hpe shaga ai da. Shi hpe shaga jang shi gaw kalang ta hprawng jang she, Myen ni gaw hpyen shadu na gap ai da” nga nna ginra masha langai tsun dan ai.

Wunpawng la wa hte Myen hpyen la ni gaw mare dingsa mung re ai, nam kata kaw hkrum katut hkat ai re.

Ndai lam hte seng nna sinat gap bun hkrum ai salang wa hte matut mahkai yu ai raitim matut mahkai nlu ai re.

Ginra masha ni tsun dan ai hta ndai salang wa gaw hpa hkala nba hte sinat machyu pala gap hkra ai lam gaw nnga ai, shaga ai hte kalang ta hprawng lawt mat wa ai re lam, tsun dan ai.

Ndai salang wa gaw mare kata nau nnga ai wa rai nhtawm bum kaw sha grau law malawng nga ai re hte nam de nga rem hkawm ai wa re hpe mung chye lu ai.