Man Ta mare kaw Myen hpyen dap nbungli bawm a majaw mungshawa si hkala

Manje ginra, Man Ta mare kaw gumshem Myen hpyen dap ni nbungli bawm wa jahkrat bun ai majaw, mungshawa si hkala hkrum ai lam chye lu ai.

February shata 21 ya shana daw hkying 4:08pm aten daram kaw nna, gasat gala majan byin ai lam nnga ai, Man Ta mare kaw gumshem Myen hpyen dap ni Y-12 nbungli hte bawm (4) lang wa jahkrat gap gasat ai majaw, mungshawa marai (2) asak si sum nna marai (3) hkala hkrum ai lam, ginra masha ni kaw na chye lu ai.

Asak si sum ai mungshawa yan gaw, Shadang Ngwa Sa Le asak 8 ning, Shayi Ya Masi asak (20) ning rai nna, hkala hkrum ai ni gaw, Shayi Ngwa Ye Mi asak 8 ning, Shadang Luka asak (10) ning hte Jan. Htun San Da asak (27) ning ni re lam chye lu ai.

Ya aten gumshem Myen hpyen dap gaw hpyen masa, mungmasa lam amyu myu hta hkrat sum nga sai majaw, gasat gala majan nbyin ai shara hkan nbungli drone ni hpe madung tawn let gap gasat nga ai majaw, mungshawa law law asak si sum nna, dum nta ni mung hten za hkrum nga ai re.