Man Wing Gyi kaw wa ana a majaw wa 400 jan si sum mat

Man Maw Ginwang, Man Wing Gyi mare kaw lai wa sai bat 2 daram kaw nna wa ana zinli du shang wa ai majaw September shata 13 ya shani du hkra rai yang, wa 400 jan si sum mat sai lam na chye lu ai.

Si mat ai wa ni gaw shat nsha ai, kan mase ai, myi bum ai hpang lagaw ni kya mat nna si mat ai re lam, ya na zawn wa ana byin nga ai aten masha nkau gaw ana hte si ai washan ni hpe gat seng de lagu dut sha ai lam ni mung nga ai raitim, mare kaw na lit nga ai mare uphkang salang ni kaw nna pat hkum ahkyak la hpaji jaw sadi jaw ai lam n galaw ai re hpe chye lu ai.

Ya na zawn wa ana byin ai lam hpe kaga mare kahtawng ni tau hkrau makawp maga lu na matu, gat kaw na washan ni hpe atsawm yu nna she mari sha na matu hte ya aten mai byin ai rai yang wa shan n mari sha yang kaja ai lam, mare kaw na lit nga ai myitsu salang ni hku nna mung dusat hkamja lam hte seng nna ningmu jahpaw, hpaji jaw hkaw tsun ai lam, sadi jaw ai lam ni hpe galaw shangun mayu ai lam, buga masha ni shana wa ai kaw na chye lu ai.