Manau shadung jun na matu akyu hpyi hpawng galaw

                                                                                  Photo Credit; Bawlam Naw

Mungmyit Sinli Ga (Kachin-Sub-state) ginra, Lashu Ginwang, Htunghking hte Laili Laika hpung kaw nna, woi awn let, Sungkoi mare hta manau shadung jun na matu October shata praw 6 ya shani akyu hpyi hpawng galaw la lu sai lam chye lu ai.

Manau shadung jun na lam hte seng nna, Lashu Ginwang Htunghking hte Laili Laika Ningbaw, Du wa Lahtaw Zau Naw tsun ai hta “Anhte a shadip jahpang ginra kaw manau shadung jun ai gaw shadip kumla re. Mungmyit Sinli ga hta nga ai anhte Wunpawng myu sha ni a htunghking kumla grau nna hkumzup wa na matu, lam shagu hta lu su rawt jat galu kaba gan ga wa na lam ni hpe yaw shada let hkrang shapraw galaw sa wa ai lam re” nga nna tsun ai.

Manau wang naura pa gaw pe 300 grup rai nna, tsaw de pe 65 hpring ai manau shadung galaw sa wa ai lam hta raitim, anhte myusha ni sha, ta tut galaw sa wa na re lam chye lu ai.

Ndai zawn manau shadung nau ra pa hpe galaw ai lam hta raitim, kadai kaw garum hpyi ai lam nnga ai sha, Lashu kaw nga ai myusha ni jawm shakut galaw nga ai lam chye lu ai.

Ya na zawn galaw ai lam gaw Lashu ginwang htunghking hpung hku nna, shawng ningnan lang manau shadung galaw ai lam re hte, jai lang ra ai gumhpraw hpe manau shadung a matu lak san myen gumhpraw kyats sen mali tsa daram sawn da ai lam chye lu ai.

Ndai zawn galaw ai lam hta bai du wa na 2022 ning na, KBC mung shawa zuphpawng hta manau nau na matu, ginwang amu madu ni hku nna, hpyi shawn da ai lam nga ai hte maren, aten dep lu ngut hkra galaw nga ai lam du wa matut tsun ai.

COVID-19 aten ladaw raitim, masat da ai tarawng tara n pu hta hkan sa shatup let, galaw sa ai majaw Asuya kaw nna, hkumpat da ai lam nnga ai hpe chye lu ai.