Manje buga hpung hta Lungseng Udang dingshawn poi hte chyum laika sharin hpawng galaw na hkyen
Manmaw Ginwang, Manje buga hpung kata kaw February shata 1-2 ya hta Lungseng Udang dingshawn poi hte chyum laika sharin hpawng lamang hpe galaw na re lam na chye lu ai.
Lungseng Udang dingshawng poi hta KBC Ningbaw Rev. Doctor Hkalam Samson hte KBC Amu Madu Rev. Hpauyawng Tu Mai yan sa du shang lawm nna Chyum laika sharin ya na re.
Sara kaba yan hpe Manje buba hpung lawk shagu na kanu kawa ni hku nna Htunghking shat makun lit gun jaw ai lam hpe mung galaw na re lam chye lu ai.
“February praw 1 ya shani hta gaw KBC Amu Madu Rev. Hpauyawng Tu Mai kaw nna “Hkalup Makam Hte Nawku Hpung Hta Sadi Dung Let Kaba Rawt Wa Ga” ngu ai ga baw hpe sharin ya na re. February praw 2 ya jahpawt hkying 9:00am aten hta gaw Lungseng Udang bum dingshawn kyuhpyi hpawng galaw na re dai kaw, KBC Ningbaw Rev. Dr. Hkalam Samson kaw nna Karai mungga hpe htawn tsun ya na re, ndai Udang bum dingshawn kyuhpyi hpawng hta nawku hpung makam masham n-ging hka ai kadai mung sa shang lawm mai ai” nga nna Salang Dumdu Zau Hkam tsun ai.
Lungseng Udang jun da ai shara gaw Yihku Manhkam hte Manje Muklum lapran na bum kaw re. Mi gaw ndai shara hpe kawa bum ngu ai re, ya gaw kyuhpyi bum ngu bai kalai masat shamying la sai.
Lungseng Udang hpe tsaw de pe 19, kaba pa ai de pe 4, htat ai de pe 2, Udang a lata pe 5 re. Manje buga hpung kaw hpung lawk 12 hta Hpang Ga Kawng, Man Yawt, Ga Ra Yang, Gan Htak, Yihku Manhkam, Lajawng, sasana daw 1, sasana daw 2, Mare Hting Wan, Jinghpaw lawk, Mawdaw lam la pai la hkra mayan hte Pyin Oo Lwin lawk ni rai nna hpung htinggaw 687 tup rai nna hpung masha yawng 3646 tup re ai lam chye lu ai.
