Manje ginra hpe KIA zing
KIA Masat (3) Dap Ba, Manje ginra hpe KIA ni zing madu la lu sai lam chye lu ai.
January shata praw 8 ya jahpawt hkying 10:00am aten daram hta Manje ginra ma hkra hpe KIA pawng hpawm hpyen hpung ni zep zi zing madu la lu sai lam, shawnglam lit nga ai salang ni tsun ai.
Manje ginra kata dap jung shara jahkrat nga ai, gumshem Myen hpyen dap Hk.M.Y (319, 601) hte Myawk dap (352) dap ni hpe KIA pawng hpawm hpyen hpung ni zep zi htim gasat zing madu la lu sai lam chye lu ai.
Laiwa sai December shata praw 4 ya shani kawn Manmaw, Manje ginra ni hpe KIA pawng hpawm hpyen hpung ni kalang ta htim gasat wa ai hta Manje hpe zing madu la lu sai rai nna, Manmaw ginra hpe mung matut htim gasat nga ding yang re ai lam chye lu ai.
Matut nna KIA Masat (9) Dap Ba, Se Zin ginra hta mung, KIA pawng hpawm hpyen hpung ni hte gumshem Myen hpyen dap ni gasat gala majan byin nga ai lam chye lu ai.
