Manje hpyen yen camp hte Hpangga Kawng hpyen yen camp hpe du wa na 2024 ning hta dawm kau na lam bawngban
Manmaw Ginwang, Manje buga kaw nga ai Manje hpyen yen camp hte Hpangga Kawng hpyen yen camp hpe du wa na 2024 ning hta dawm kau na matu bawng ban ai lam chye lu ai.
Ndai hpyen yen camp lahkawng dawm kau na lam hpe seng ang ai Wuhpung wuhpawng de laika bang da sai rai nna, du wa na 2024 ning May shata hta hpang jahtum tawn nna, dawm kau na re lam chye lu ai.
Lai wa sai 2019 ning hta hpyen yen camp lahkawng na htinggaw 20 jan gaw tinang buga de bai wa nga magang sai ni hpe KBC kaw nna, htinggaw langai mi hta lap 500,000 (Sen Manga) karum ai lam nga ai re. RCM nawku hpung masha ni hpe gaw 2023 ning November shata kaw nna, nawku hpung hku nna lakawn la na re lam chye lu ai.
“Ya tinang buga de bai wa nga ai mare masha nkau ni gaw ja gumhpraw yak hkak ai majaw nta nlu galaw ai sha n ga, gan nga na ginsum galaw na matu pyi yak nga ai” nga nna buga masha langai tsun ai.
Manje hpyen yen camp hte Hpangga Kawng hpyen yen camp gaw lai wa sai 2011 ning hta na hpyen koi yen wa ai rai nna, nta htinggaw yawng 100 jan nga ai rai nhtawm, mare kahtawng 10 jan kaw na mungshawa ni shanu shingbyi nga ai re hpe mung chye lu ai.
