Manje mare kata Ka-ni nanghpam lu sha masha grau law jat wa ai majaw, lagu lagut manghkang ni jahkring hkring byin nga

Manmaw, Manje myo mare kata Ka-ni nanghpam lu sha masha lani hte lani grau law jat wa ai sha n-ga, lagu lagut mya lu mya sha manghkang ni jahkring hkring byin wa ai majaw, Manje mare masha ni myit ru myit tsang hkrum nga ai lam na chye lu ai.

November shata 29 ya jahpawt hkying 10:00am aten hta mung Manje mare na hpawmi langai gat dut sa nna bai wa ai ten, nta garai ndu shi yang lam kaw bawchyawp chyawp nna Mask magap ai la langai gumhpraw nhpye kashun la nhtawm hprawng mat ai hta, Phone langai, gumhpraw sen 2 hte gat dut lu ai gumhpraw ni lawm mat ai re lam, Manje mare na Salang langai tsun dan ai kaw na chye lu ai.

Laiwa sai ten hta mung Manje mare grup yin hta cycle gashun nna masha adup abyen ai lam ni jahkring hkring byin ai sha n-ga, mare dum nta hkan na arung arung lagu mya la ai lam ni byin ai re lam chye lu ai.

Manje mare kata Ginra Ka-ni Nanghpam Pat Jasan Hpung ni bungli nlu shang mat ai 2017 ning hpang daw kaw nna, mare kata Ka-ni nanghpam lu sha ai masha grau law jat wa ai majaw, lagu lagut manghkang ni jahkring byin nga ai re lam, ginra masha ni tsun nga ma ai re.

Ginra Asuya Balik Dap ni kaw nna mung, Ka-ni nanghpam dut lu dut sha ai masha ni hte Ka-ni nanghpam lu sha ai masha ni hpe tang du hkra jep sagawn ahkyak la ai lam nnga ai majaw, Ka-ni lu sha ai masha ni grau law jat wa ai re lam chye lu ai.

Ka-ni nanghpam lu sha ai masha ni gaw asak 14-30 ning lapran na ramma ni grau law ai majaw, mare kata htenza ai masha ni grau law jat wa na hpe myit tsang nga ai sha n-ga, Ka-ni dut sha ai masha ni hte lu sha ai masha ni hpe mung, ja ja ahkyak la jep sagawn ya na hpe mare masha ni ra sharawng nga lam, Manje mare kata dum nta htinggaw 1400 daram nga ai hta, ka-ni lu sha ai masha lani mi laman 200 daram du nga sai lam chye lu ai.

Photo Credit; Ah Zau