Manje Muklum kata gumshem Myen hpyen dap ni laknak kaba matut gap shadam bun nga
KIA Masat (3) Dap Ba, Masat (1) Dap Dung ginra, Nba Pa Ginwang, Manje Muklum kata gumshem Myen hpyen dap ni laknak kaba hkrup mara matut gap shadam bun nga ai lam chye lu ai.
February shata 16 ya shani kaw na 19 ya shani du hkra gumshem Myen hpyen dap Hk.L.Y (47), Hk.M.Y (319) hte Hk.M.Y (601) lapran na laknak kaba dap ni, Manje Muklum kata laknak kaba hkrup mara matut manoi gap bun nga ai re lam chye lu ai.
“Shana de hkying 5:00pm aten kaw na gap hpang sai, hkying 9:00pm aten hkan du hkra matut manoi hkrup mara gap bun ai, Manmaw de hprawng ga ngu yang mung Myen ni bai rim, Manje kaw nga ga nga yang, Myen a sinat kaba hkrit rai yak nga ga ai” nga nna ginra masha langai tsun ai.
Laknak kaba hkrat kapaw ai majaw mungshawa ni a dum nta ni hten za mat ai sha n-ga, mare masha ni hkala hkrum ai lam ni nga ai rai nna, mare kata laknak kaba hkrat kapaw ai a ntsa seng ang ai salang ni, mare lawk salang ni hku na lit la hparan ai lam, mungshawa ni hpe gara hku ganing rai ga nga na woi awn galaw ai lam hpa nnga ai nga nna, ginra masha matut tsun ai.
Manje muklum kata shanu nga ai mungshawa yawng htinggaw 1000 mi jan nga ai hta Jinghpaw, Myen, Sam, Rawang hte Gala baw sang ni shanu nga ai re hpe chye lu ai.
