Manmaw buga ramma ni Covid-19 ana makawp maga tsi gat ya

Manmaw Ginwang, Manmaw buga hkalup hpung woi sara ni woi awn nna, buga ramma ni gaw garum hpyi wa ai mare buga shara shagu hta Covid-19 ana makawp maga ai Sodium Hypochlorite tsi hkan gat ya nga ai lam chye lu ai.

“Anhte a yaw shada lam gaw, ndai covid-19 ana makawp maga ai lam hta kaga lam hku nlu garum ai raitim, tsi gat ai lam hte sha anhte lu garum ga ai re. Dai majaw garum hpyi ai shara shagu hta dangdi ai daram gat ya na re” nga nna tsi gat ai kaw woi awn galaw ai shadang Zau Mung Du tsun ai.

Tsi gat ai lam hpe nawku hpung lawk nkau mi hte ginwang rung kaw tawn da ai Quarantine shara ni hta gat ngut sai rai nna, garum hpyi wa ai kaga shara ni hta mung, gat ya na re lam chye lu ai.

Ya na zawn Sodium Hypochlorite tsi gat ai lam hpe, Manmaw Buga Hkalup Hpung na ramma marai 7 shang lawm let, April shata 20 ya shani kaw nna, galaw hpang wa ai re hpe mung chye lu ai.