Manmaw de rawt lung wa ai Myen hpyen dap sanghpaw hpung hpe KIA pawng hpawm hpung ni gap gasat
Manmaw de hpyen n-gun jat laknak arung arai htaw lung wa ai gumshem Myen hpyen dap sanghpaw hpung ni hpe KIA pawng hpawm hpyen hpung ni gap gasat dat ai lam chye lu ai.
July shata 29 ya shani Shwegu kaw na Manmaw de hpyen n-gun jat laknak arung arai htaw lung wa ai, gumshem Myen hpyen dap sanghpaw hpung ni hpe KIA pawng hpawm hpyen hpung ni gap gasat dat ai majaw, Shwegu de bai nhtang yu mat wa ai lam, shawnglam lit nga ai salang ni kaw na chye lu ai.
Sanghpaw hpung ni hpe gap shingla gasat dat ai hta sanghpaw nkau htenza mat ai nga nna, shiga lawk nkau hta mu lu ai raitim shiga hkum tsup hpe matut sagawn nga ding yang rai nna, sanghpaw ni hpe makawp maga ai gumshem Myen hpyen dap hpyen hpung ni hte mung, Shwegu grup yin kaw laja lana gasat gala majan byin ai lam chye lu ai.
Ya aten gumshem Myen hpyen dap gaw, Manmaw ginra ntat sum hkra nbungli, drone ni hte gap gasat nga ai sha n-ga, hka lam hku nna mung hpyen n-gun htu shadut nga ding yang re ai majaw, lahkawng maga hpyen masa shaja hkat nga ding yang re ai lam matut chye lu ai.
