Manmaw ginra gasat gala majan laja lana matut byin nga

Manmaw ginra hta gasat gala majan laja lana matut byin nga ai lam chye lu ai.

May shata praw 3 ya shani du hkra, Manmaw ginra hta KIA pawng hpawm hpyen hpung ni hte gumshem Myen hpyen dap ni gasat gala majan laja lana matut naw byin nga ai lam, shawnglam lit nga ai salang ni tsun ai.

Manmaw ginra hta naw ngam nga ai gumshem Myen hpyen dap Ts.K.Hk (21) hte dap shara nkau hpe KIA pawng hpawm hpyen hpung ni padang dip la lu hkra, matut htim gasat nga ai hta gumshem Myen hpyen dap ni mung, Manmaw ginra nhkrat sum hkra nbungli, drone, laknak kaji kaba hpan hkum hte shani shagu ninghkap gap gasat nga ding yang re ai hpe chye lu ai.

Matut nna Hpakant, Kamaing ginra hta mung, gumshem Myen hpyen dap hte P.T.Ts pawng hpawm hpyen hpung ni hpyen n-gun htu shadut nga ai majaw, shani shagu ngu na KIA ni hte gasat gala majan byin nga ai lam chye lu ai.