Manmaw ginra gasat gala majan matut byin

Manmaw ginra hta KIA hte gumshem Myen hpyen dap ni gasat gala majan laja lana matut byin nga ai lam chye lu ai.

January shata 23 ya shani kaw nna, Manmaw ginra hta KIA pawng hpawm hpyen hpung hte gumshem Myen hpyen dap ni gasat gala majan, numdaw kalang bai matut byin nga ai lam, shawnglam lit nga ai salang ni tsun ai.

Gumshem Myen hpyen dap gaw, gasat gala majan zim nga ai aten hta raitim, shani shagu ngu na nbungli bawm, drone bawm ni hte gap gasat nga ai sha n-ga, mungshawa ni a dum nta hpe wan nat jahten ai lam ni galaw nga ai majaw, mungshawa dum nta law law hten za nga ai lam chye lu ai.

Manmaw ginra hta KIA pawng hpawm hpyen hpung ni hte gumshem Myen hpyen dap ni gasat gala majan byin ai shata mi jan na wa sai raitim, ya aten du hkra lahkawng maga na hpyen masa shaja hkat nga ding yang re hpe matut chye lu ai.