Manmaw ginra gasat gala majan matut manoi laja nga
KIA Masat (3) Dap Ba, Manmaw ginra hta gasat gala majan matut manoi laja nga ai lam chye lu ai.
August shata 28 ya shani du hkra, Manmaw hpri gang dap, myawk dap, nbungli pa, Manmaw dakkasu hte Muklum kata ni hta KIA pawng hpawm hpyen hpung ni hte gumshem Myen hpyen dap ni gasat gala majan matut manoi byin nga ai lam, shawnglam lit nga ai salang ni kaw na chye lu ai.
Gasat gala majan byin nga ai hta gumshem Myen hpyen dap ni gaw, Manmaw ginra nhkrat sum hkra KIA pawng hpawm hpyen hpung ni gasat zing tawn da sai shara ni de lagaw lam hku nna htu shadut htim gasat nga ai sha n-ga, shani shagu nbungli, drone, laknak kaba hpan hkum hte ladat amyu myu hku gap gasat nga ai majaw, gasat gala majan laja lana matut byin nga ai lam chye lu ai.
Dai hte maren Hpakant, Waimaw ginra ni hta mung, gumshem Myen hpyen dap ni hpyen n-gun htu shadut shamu shamawt nga ai majaw, gasat gala majan byin nga ai rai nna nbungli, drone, laknak kaba ni hte mung hkrup mara gap shadam bun nga ai majaw, mungshawa si hkala hkrum nga ai hte dum nta law law hten za hkrum nga ai re.
Ya aten gumshem Myen hpyen dap ni gaw Manmaw, Hpakant hte Waimaw ginra ni hta ladat amyu myu hku nna, hpyen n-gun htu shadut htim gasat ai lam ding yang galaw nga ai rai nna, lahkawng maga hpyen masa shaja hkat nga ding yang re ai lam matut chye lu ai.
