Manmaw ginra gasat gala majan matut naw laja nga

Manmaw ginra hta KIA hte gumshem Myen hpyen dap ni gasat gala majan matut manoi naw laja nga ai lam chye lu ai.

February shata praw 4 ya shani du hkra, Manmaw ginra hta KIA pawng hpawm hpyen hpung ni hte gumshem Myen hpyen dap ni gasat gala majan matut manoi naw byin nga ai lam, shawnglam lit nga ai salang ni tsun ai.

Gumshem Myen hpyen dap a shara law malawng hpe KIA pawng hpawm hpyen hpung ni zing madu la lu sai raitim, naw ngam nga ai dap shara ni hpe matut naw htim gasat nga ding yang re ai hta gumshem Myen hpyen dap maga na mung, nbungli drone ni hte gap gasat nga ding yang re ai hpe chye lu ai.

Matut nna Sagaing jarit Sezin ginra hta mung, KIA pawng hpawm hpyen hpung ni hte gumshem Myen hpyen dap, Sam hkyeng P.T.Ts pawng hpawm hpyen hpung ni February shata praw 1 ya shani kaw nna gasat gala majan byin nga ai lam chye lu ai.