Manmaw ginra hta gasat gala majan matut byin nga
KIA Masat (3) Dap Ba, Manmaw ginra hta gasat gala majan matut byin nga ai lam chye lu ai.
Manmaw Deng (3) maga de gumshem Myen hpyen dap ni ndai laman laja lana hpyen shamu shamawt hkawm ai lam galaw nga ai majaw, KIA pawng hpawm hpyen hpung ni hte gumshem Myen hpyen dap ni gasat gala majan byin nga ai lam, lit nga ai salang ni kaw na chye lu ai.
Gasat gala majan byin nga ai hta gumshem Myen hpyen dap gaw nbungli, drone, laknak kaba ni hte shani shagu gap gasat nga ai rai nna, KIA maga mung ninghkap gap gasat nga ding yang re ai lam chye lu ai.
Manmaw ginra hta KIA hte gumshem Myen hpyen dap ni gasat gala majan byin ai laning mi du wa sai rai nna, ya aten du hkra lahkawng maga hpyen masa shaja hkat nga ding yang re ai lam chye lu ai.
Hpakant ginra hta mung gumshem Myen hpyen dap ni ndai laman shawoi na hta grau hpyen shamu shamaw hkawm nga ai hta gasat gala majan mung, shani shagu ngu na byin nga ai rai nna, gumshem Myen hpyen dap ni nbungli, drone, laknak kaba ni hte hkrup mara gap shadam bun nga ai majaw, mungshawa si hkala hkrum nga ai hte dum nta ni hten za hkrum nga ai re.
Matut nna Hkawng Lang Hpu hte Lamyang ginra hta mung, gumshem Myen hpyen dap ni hpyen n-gun jat bang nga ai sha n-ga, nbungli, drone, laknak kaba ni hte shani shagu ngu na gap gasat ai lam galaw nga ai hpe chye lu ai.
