Manmaw ginra majan bai laja nga

Manmaw ginra hta KIA hte gumshem Myen hpyen dap ni gasat gala majan bai laja nga ai lam chye lu ai.

April shata 25 ya jahpawt hkying 4:00am aten daram kaw nna, Manmaw gumshem Myen hpyen dap Ts.K.Hk (21) hte naw ngam nga ai dap shara ni hpe KIA pawng hpawm hpyen hpung ni numdaw kalang bai htim gasat nga ai lam, shawnglam lit nga ai salang ni tsun ai.

Gasat gala majan laja nga ai hta gumshem Myen hpyen dap ni nbungli, drone ni hpe n-gun dat let gap gasat nga ai hta KIA pawng hpawm hpyen hpung ni mung, matut htim gasat nga ai majaw majan laja nga ai lam chye lu ai.

Hpakant lam de mung, gumshem Myen hpyen dap hte P.T.Ts pawng hpawm hpyen hpung ni n-gun kaba hte htu shadut lung wa nga ai majaw, KIA pawng hpawm hpyen hpung ni hte gasat gala majan laja lana byin nga ai lam chye lu ai.