Manmaw ginra majan matut laja nga

Manmaw ginra hta KIA pawng hpawm hpyen hpung ni hte gumshem Myen hpyen dap ni gasat gala majan matut laja nga ai lam chye lu ai.

April shata 30 ya shani du hkra, Manmaw ginra naw ngam nga ai gumshem Myen hpyen dap Ts.K.Hk (21) hte dap shara nkau hta KIA pawng hpawm hpyen hpung ni hte gumshem Myen hpyen dap ni gasat gala majan laja lana matut naw byin nga ai lam, shawnglam lit nga ai salang ni kaw na chye lu ai.

Gasat gala majan laja nga ai hta gumshem Myen hpyen dap gaw, Manmaw ginra nhkrat sum hkra, shani shagu nbungli, drone ni hte ninghkap gap gasat nga ding yang re ai hpe chye lu ai.

Matut nna KIA Masat (1) Dap Ba, Gwi Htau ginra hta mung, gumshem Myen hpyen dap ni hpyen shamu shamawt htu shadut lung wa ai majaw, KIA pawng hpawm hpyen hpung ni hte shani shagu ngu na gasat gala majan byin nga ai lam chye lu ai.