Manmaw ginra Myen hpyen dap ni nbungli hte ding yang gap gasat nga

Manmaw ginra hta gumshem Myen hpyen dap ni nbungli hte ding yang gap gasat nga ai lam chye lu ai.

Gumshem Myen hpyen dap ni nnang nawn kaba a majaw, gan gap hkat jahkring na matu ndau laika shapraw da ai raitim, April shata praw 9 ya jahpawt du hkra Manmaw ginra hta nbungli, drone ni hte bawm jahkrat gap gasat nga ai lam, lit nga ai salang ni tsun ai.

Ya aten Manmaw ginra hta gasat gala majan byin ai lam nnga ai raitim, gumshem Myen hpyen dap ni nbungli hte gap gasat nga ai sha n-ga, lagaw lam hte htu shadut ai lam, malu masha, laknak arung arai ni hpe mung, ding yang htaw jahkrat ya nga ai hpe chye lu ai.

Waimaw Lamyang ginra ni hta mung, gumshem Myen hpyen dap ni hpyen n-gun htu shadut, hpyen shamu shamawt ai lam ding yang galaw nga ai hpe matut chye lu ai.